‘राते काईला’ को ‘साढे सात’, हिरो सत्यराज हिरोइन मेनुका

नेपाली चलचित्रसँगै बलीउड अभिनेत्री प्रियंका चोपडा अभिनित चलचित्र ‘मेरी कोम’ मा समेत काम गरिसकेका सुनील थापा (राते काईला) ले नेपाली चलचित्र निर्माण गर्ने भएका छन् । ‘साढे सात’ नाम राखिएको यो चलचित्रमा गायक स्वरुपराज आचार्य र सत्यराज आचार्यको ब्यानर सत्य-स्वरुप इन्टरटेन्मेन्टसँगै मुभी इन्टरटेन्मेन्ट र ब्याक पेपर स्टुडियोजको लगानी रहनेछ । अनौठो त यो छ कि चलचित्रमा जो लगानीकर्ता छन्, उनै चलचित्रको मुख्य भूमिकामा रहनेछन् । कलाकार सुनील थापाले ‘सिनेखबर डटकम’ सँगको कुराकानीको क्रममा चलचित्र ‘साढे सात’ ले साँझ साढे सात बजे घटेको एक भयानक घट्नालाई देखाउने बताए ।
अहिले यो चलचित्रको वर्कशप चलिरहेको छ । माघ २५ गतेबाट फ्लोरमा जान लागेको यो चलचित्रलाई साम्तेन भुटियाले निर्देशन गर्नेछन् । सस्पेन्स थ्रिलर भनिएको यो चलचित्रमा सत्यराज आचार्य, मेनुका प्रधान, शिशिर बाङदेल, सुनिल थापा, कामेश्वर चौरसिया लगायतका कलाकारहरुको मुख्य भूमिका रहेको छ । तराई बेश स्टोरी रहेको चलचित्र ‘साढे सात’ को छायाँकन रुपन्देही, नवलपरासी लगायतका जिल्लाहरुमा हुने चलचित्रका निर्माता एवं कलाकार सुनील थापाले जानकारी दिए ।