यस बर्ष प्रदर्शनमा आउने वा नआउने अन्योलमा रहेको रेखा थापा स्टारर चलचित्र ‘पलाँस’ ले अन्ततः यसै बर्षको चैत १८ गतेलाई आफ्नो रिलिज डेट लक गरेको छ । रिलिज डेटसँगै निर्माणपक्षले चलचित्रको एक गीतको लिरिकल भिडियो सार्वजनिक गरिएको छ । ‘हेल्प लिन सक्छौ म बाट’ बोलको गीतमा गायक सुगम पोख्रेलको आवाज छ । सुवास कोइरालाको निर्देशनमा तयार भएको यो चलचित्रमा नायिका रेखा थापा, अयुव केसी, कामेश्वर चौरासियाको मुख्य भूमिका छ । रेखाको भूमिकालाई अहिलेसम्म निर्माणपक्षले गोप्य राखेको छ ।
यसैविच, चलचित्रको ‘हेल्प लिन सक्छौ म बाट’ बोलको गीतको ‘कभर गीत प्रतियोगीता’ आयोजना गरिएको छ । फागुण ९ गतेबाट चैत्र १५ गतेसम्म यो गीतको कभर गीत गाएर पठाउन सकिनेछ । गीत गाएको अडियो वा भिडियो तयार गरेर ‘पलाँस’को अफिसियल फेसबुक पोजमा पोष्ट गर्न सकिनेछ । फेसबुकमा पोष्ट भएका गीतमध्ये १ लाइकको १ अंक र १ शेयरको २ अंक प्रतियोगीले प्राप्त गर्नेछन् । प्राप्त कभर गीतमध्ये उत्कृष्ट ५ को चयन गरिनेछ । यसपछि, ‘पलाँस’को टिमले विजेताको घोषणा गर्नेछ । विजेताले १ लाख नगद पुरस्कार प्राप्त गर्ने निर्माणपक्षले जनाएको छ । यस्तै, ५ उत्कृष्ट कभर गीत गाउने प्रतियोगीले विशेष गिफ्ट ह्याम्पर प्राप्त गर्नेछन् । लाइक र शेयर बढाउनका लागि फेसबुकमा वुष्ट गर्नेलाई असक्षम घोषणा गर्न समेत सकिने, शर्त राखिएको छ ।