“करोडपति” राजपालको शिरमा ढल्कियो भादगाउँले टोपी

बलीउड चलचित्रका चर्चित कमेडियन राजपाल यादव अहिले नेपालमा छन् । उनी नेपालमा हुनुको कारण हो, एक नेपाली चलचित्रमा उनी मुख्य भूमिकामा देखिँदैछन् । अभिनेता राजपाल यादव नेपाली चलचित्र “करोडपति” मा काम गर्नका लागि नेपाल आएका हुन ।
यो चलचित्रको नाममा आजभन्दा एक दशक अगाडी नायक भुवन केसीले अभिनय गरेका थिए, जुन चलचित्र सुपरहिट भएको थियो ।
हाल काठमाडौंमा छायाँकन भइरहेको यो चलचित्रमा राजपाल यादव एक नेपाली यूवकको भूमिकामा देखिँदैछन् । उनी मंगलबार मात्र यो चलचित्रका लागि नेपाल आएका थिए भने बुधबार उनले “करोडपति” का लागि पहिलो सट पनि दिइसकेका छन् । झण्डै २ हप्तासम्म नेपालमा रहने राजपाल यादवको “करोडपति” लुक्स पनि सार्वजनिक भएको छ । चलचित्र “करोडपति” का नायक तथा निर्माता आर्यन अधिकारीले आफ्नो फेसबुकमा एक तश्वीर शेयर गर्दै राजपाल यादवको लुक्स सार्वजनिक गरेका हुन । तश्वीरमा राजपाल यादवले दौरासुरुवालमाथी हाफ ज्वारी कोट र शिरमा नेपाली भादगाउँले टोपी लगाएका छन् । यसबाट के स्पष्ट हुन्छ भने राजपाल यादव चलचित्र “करोडपति” मा नेपाली बाबु बनेका छन् ।
अधिकारी वं्रदर्स पिक्चर्स र केतन फिल्मसको संयूक्त ब्यानरमा बन्न लागेको यो चलचित्रमा राजपाल यादवसँगै नेपाली कलाकार आर्यन अधिकारी र नीता ढुंगानाको पनि मुख्य भूमिका रहेको छ । करिब २ हप्ता राजपाल यादवको भागमा रहेको सिन खिचेपछि “करोडपति” टोली बाँकी छायाँकनका लागि मुस्ताङ र जोमसोम जानेछ । १५ दिनसम्म मुम्बईमा समेत खिचिने यो चलचित्रमा दुई बलीउड कलाकारहरुको समेत अभिनय रहने बताइएको छ ।