सौगातले नमान्दा बेनिशाको ‘झ्यानाकुटी’ कर्मासँग !

नायिका निशा अधिकारी पहिलो पटक निर्मात्री बन्दैछिन् । उनको लगानीमा निर्माण हुन लागेको चलचित्र ‘झ्यानाकुटी’ को अहिले धमाधम छायाँकन भइरहेको छ । केही दिन अगाडी एउटा खबर बाहिरिएको थियो कि चलचित्र ‘झ्यानाकुटी’ मा सौगात मल्लले नायिका बेनिशा हमालसँग रोमान्स गर्दैछन् र त्यसको केही दिनमा अर्को खबर आयो सौगातले उक्त चलचित्रमा काम गर्न अस्वीकार गरे । यसैबीच नायिका तथा निर्मात्री निशा अधिकारीले बेनिशाको ‘झ्यानाकुटी’ नायक कर्मा शाक्यसँग गर्ने भएकी छिन् । यस विषयमा निर्माणपक्षले कुनै पनि जानकारी भने दिएको छैन तर स्रोतका अनुसार अहिले घले गाउँमा छायाँकन भइरहेको यो चलचित्रमा नायिका बेनिशा हमाल र कर्माको जोडी बाँधिएको छ । यसको पृष्टि नायिका निशा अधिकारीले आफ्नो फेसबुकमा अपलोड गरेको तश्वीरबाट पनि हुन्छ । उनले चलचित्र ‘झ्यानाकुटी’ को छायाँकनका लागि घले गाउँ जाँदै गरेको केही तश्वीरहरु शेयर गरेकी छिन्, जुन तश्वीरमा कर्मा, बेनिशा र निशा देखिएका छन् । चलचित्रमा निशाको भने अभिनय रहने छैन । चलचित्र ‘झ्यानाकुटी’ को सम्पूर्ण छायांकन भने घले गाउँमा हुनेछ । यो चलचित्रको निर्माणमा नायिका अधिकारीलाई सिमोस सुनवारले सहयोग गर्नेछन् । चलचित्रका निर्देशक पनि सिमोस नै हुन । द एल्लो ब्याण्ड क्रियसनको ब्यानरमा यो चलचित्र बन्नेछ ।