निखिलसँग दया र सौगातको भिडन्त सुरु, कसले कति छाप्लान् पैसा ?

आजबाट नेपाली हलहरुमा यस बर्षका दुई प्रतिक्षित चलचित्रहरु एकसाथ प्रदर्शनमा आएका छन् । निखिल उप्रेतीको यस बर्षका लागि अन्तिम चलचित्र ‘निर्भय’ र ‘लुट २’ पश्चात यस बर्ष एकसाथ देखिन लागेका सौगात मल्ल र दयाहाङ राई अभिनित चलचित्र ‘लप्पन छप्पन’ ले आज शुक्रबारबाट एकसाथ प्रदर्शन आरम्भ गरेका हुन । मल्टिप्लेक्समा राम्रो पकड जमाएका दया र सौगातसँग सिंगल हलका बादशाह निखिल उप्रेतीले कति पैसा छाप्ने हुन त्यसको नतिजा भने आजबाटै हेर्न पाइनेछ ।
निर्देशक मधुशुदन भट्टराईले निर्देशन गरेको चलचित्र ‘निर्भय’ मा नायक निखिल उप्रेती प्रहरकिो भूमिकामा छन् भने उनको अपोजिटमा नायिका नीता ढुंगानाले अभिनय गरेकी छिन् । यो चलचित्रलाई देवी प्रसाद पाण्डेले निर्माण गरेका हुन । चलचित्र ‘निर्भय’ मा नायक निखिल उप्रेतीले खतरनाक रियल स्टन्डका दृश्यहरु दिएका छन् । चलचित्रमा निखिल र नीताका अलवा शुशिल पोखरेल, विकास चापागाई, विशाल पहाडी, कृष्ण शिवाकोटी, प्रदिप ढकाल, प्रज्ज्वल गिरी, रश्मि भट्ट लगायतको अभिनय रहेको छ ।
त्यस्तै, स्विजरल्याण्ड, नेदरल्याण्ड, बेल्जियममा छायांकन गरिएको चलचित्र ‘लप्पन छप्पन’ मा सौगात मल्ल, दयाहाङ राई, अर्पण थापा, बर्षा सिवाकोटी, श्याम श्रेष्ठ, देवु श्रेष्ठ, शिव खरेल, प्रकाशजंग शाह, सुन्दर श्रेष्ठ, शान्ती भट्ट लगायतका कलाकारको अभिनय छ । चलचित्रमा मुकुन्द भट्टको लेखन तथा निर्देशन छ । पुरुषोत्तम प्रधानले खिचेको चलचित्रमा चन्द्र पन्तको एक्सन, सुरेन्द्र पौडेलको सम्पादन, दीपक आरजेको संगीत छ । डम्बर बहादुर चन्द निर्माता रहेको यो चलचित्रमा इन्द्रप्रसाद खरेल सह-निर्माता र सहदेव गौतम कार्यकारी निर्माता हुन ।