भदौं ३ मा ‘विर विक्रम’ र ‘चपली हाईट २’ को महायुद्ध, दुवैको नजर मल्टिप्लेक्समा

एउटै रिलिज मितिमा एकभन्दा बढी चलचित्र प्रदर्शनमा आउनु अनौठो होइन तर एकै मितिमा दुई ठुला फिल्म एकसाथ प्रदर्शनमा आउँदा घाटा निर्मातालाई नै हुने गर्छ । त्यस्तै हुँदैछ भदौं ३ गते पनि । दुई राम्रो भनिएका चलचित्रहरु एकसाथ प्रदर्शनमा आउँदैछन् । त्यसो त भदौंमा राम्रा भनिएका चलचित्रहरु अन्य चलचित्रहरुसँग एकसाथ प्रदर्शनमा आउँदैछन् । तर दर्शकहरुको नजर अहिले भदौं ३ गतेमा छ । कारण भदौं ३ गते चलचित्र ‘विर विक्रम’ र ‘चपली हाईट २’ रिलिज हुँदैछ । दयाहाङ राई अभिनित चलचित्र ‘विर विक्रम’लाई जसरी दर्शकहरुले प्रतिक्षित चलचित्रको रुपमा हेरेका छन् त्यसरी नै चलचित्र चपली हाईट २ लाई पनि हेरेको पाइन्छ । पहिलो भाग सफल भएपछि निर्माण गरिएको चलचित्र ‘चपली हाईट २’ को ट्रेलर र गीतले अहिले राम्रै हंगामा पनि गरिरहेको छ ।
‘चपली हाईट २’ का नायक आयुष्मान देशराज श्रेष्ठका आफ्नै फ्यान फलोअर्स भएका कारण दयाहाङको चलचित्र विर विक्रमसँग राम्रै महायुद्ध हुने पक्का छ । मिलन चाम्सद्धारा निर्देशन चलचित्र विर विक्रम र दिपेन्द्र के. खनाल निर्देशित चलचित्र चपली हाईट २ जसरी दर्शकहरुको प्रतिक्षित बनाइरहेको छ त्यो हिसाबले हेर्ने हो भने दुई चलचित्र मध्ये एक चलचित्रले रिलिज मिति रोक्नु पर्थ्यो तर अब यि दुवै चलचित्र अन्तिम लडाईका लागि तयार भइसकेका छन् । हेर्न अब यो बाँकी छ कि भदौं ३ गतेबाट यि दुई चलचित्र मध्ये कसले बाँजी मार्ने छ । सिंगल हल भन्दा पनि मल्टिप्लेस लक्षित यि दुवै चलचित्रको लडाई मल्टिप्लेक्समै हेर्न लायकको हुनेछ ।