अबुधाबीमा ‘म्यूजिक भिडियो अवार्ड’ हुने, केसी भन्छन्, ‘पैसा कमाउन अवार्ड गर्न लागेको होइन’

प्रत्येक दिन नेपाली बजारमा दर्जनौ म्यूजिक भिडियो सार्वजनिक हुन्छन् तर हालसम्म म्यूजिक भिडियो निर्माण गर्ने व्यक्ति, कलाकार देखी प्राविधिकहरुलाई अहिलेसम्म प्रोत्साहन स्वरुप कुनै पनि अवार्ड भएको पाइँदैन । तर पहिलो पटक अन्तरराष्ट्रिय रुपमा विदेशमा नेपाली म्यूजिक भिडियो अवार्ड आयोजना हुने भएको छ । सेप्टेम्बर ९ अर्थात भदौ २४ गते यूएइको अबुधाबीमा यो अवार्ड आयोजना हुन लागेको हो । मंगलबार राजधानीमा ‘नेपाली म्यूजिक भिडियो अवार्ड’ को विषयमा आयोजित पत्रकार सम्मेलनमा अवार्डको तयारी र कार्यक्रम शैलीको बारेमा जानकारी दिइएको छ । संगीक्षा फिल्मस्को आयोजनामा यूएइको नमस्ते ट्राभल्स्ले अवार्ड आयोजनामा सहकार्य गर्नेछ ।
यूएइबाट पत्रकार सम्मेलनका लागि नेपाल आएका महेश गिरी र एकेन्द्र थापाले अवार्डको बारेमा जानकारी गराएका थिए । कार्यक्रममा बोल्दै थापाले आफू यूएइ फर्किएपछि अवार्डको प्रचार र तयारी सुरु गर्ने बताए । उनले नेपाली कला र सस्कृतीलाई विदेशमा पनि अगाडि बढाउन अवार्डको आयोजना गर्न लागिएको जानकारी दिए । यस्तै, आयोजक मध्येका अर्का एक महेश गिरीले दुबई, अवुधावीमा पुगेर बलिउड चलचित्रको छायांकन हुने, अवार्ड हुने भन्दै अब नेपाली म्यूजिक भिडियो अवाडले नयाँ शैलीको ढाँचा कोर्ने बताए । उनले यो अवार्ड म्यूजिक क्षेत्रको मात्र नभएर देशकै अवार्ड भएको बताए । संगीक्षा फिल्मस्का अध्यक्ष तथा अवार्ड आयोजना गर्न लागेका मनोज केसीले चलचित्रपछि आफूले म्यूजिक भिडियोको अवार्डमा हात हालेको बताए ।
उनले आफूले पैसा कमाउन भन्दा पनि मलामी कमाउनका लागि यस्ता खालका कार्यक्रम गरेको बताउँदै अवार्डमा कुनै धाँधली नहुने स्पष्ट पारे । पहिलो ‘नेपाली म्यूजिक भिडियो अवार्ड’मा १७ विधामा अवार्ड प्रदान गरिदैछ । अवार्डमा सहभागी हुनका लागि ५० जनाको कलाकार र पत्रकारको टोली यूएइ पुग्नेछन् । अवार्ड आयोजना गर्न लागेको केसीका अनुसार यही अवार्डमा चलचित्र क्षेत्रका ४ जना हस्तीलाई पनि सम्मान गरिनेछ । उनका अनुसार गतबर्षको ‘पपुलर चलचित्र, पपुलर निर्देशक, पपुलर नायक र पपुलर नायिका’लाई सम्मान गरिनेछ । यस्तै, यूएइमा बसेर नेपाली संगीतमा लागिरहेका संगीतकर्मीलाई पनि सम्मान गरिनेछ । अबुधाबीमा हुने म्यूजिक भिडियो अवार्डलाई शुभकामना दिन कार्यक्रममा गायिका रेखा शाह, मोडल पल शाह, नायिका पुजा शर्मा, संगीतकार अर्जुन पोख्रेल लगायतका व्यक्तिहरुको उपस्थिती रहेको थियो ।