के बाँधिएला दयाहाङसँग स्वेताको जोडी ?

अब चाँडै नायिका स्वेता खड्का नयाँ चलचित्रमार्फत कमब्याक गर्ने तयारीमा छिन् । श्रीमान तथा नायक श्रीकृष्ण श्रेष्ठको अन्तिम चलचित्र ‘कोहिनूर’ मा मुख्य भुमिका निर्वाहा गरेकी स्वेताले त्यसपछि कुनै पनि चलचित्रमा काम गरेकी थिइनन् । श्रीकृष्णको वियोगमा झण्डै २ बर्ष चलचित्रको पर्दाबाट टाढा रहेकी उनी यसै बर्षको अन्त्यबाट नयाँ चलचित्रको छायाँकनमा व्यस्त हुँदैछिन् । नयाँ चलचित्रलाई स्वेता आफैले निर्माण गर्दैछिन् भने ‘कोहिनूर’ निर्देशक आकाश अधिकारीले निर्देशन गर्ने पक्का भइसकेको छ । चलचित्र नेपाः मुभिजबाट निर्माण हुन लागेको हो । चलचित्रका लागी अहिले नायकको खोजी भइसकेको छ । ‘सिनेखबर डटकम’ लाई प्राप्त जानकारी अनुसार, अहिले नायक दयाहाङ राईसँग चलचित्रको विषयमा कुरा भइरहेको छ । एक चरणको भेट दयाहाङसँग भइसकेको छ भने अर्को चरणको भेटमा दयाहाङसँग पक्कापक्की हुनेछ । हाल दयाहाङ नयाँ चलचित्र ‘ह्याप्पी डेज’ को छायांकनका लागी बेलायतमा भएका कारण यस विषयमा निर्माणपक्षले अरु कुरा गर्न भ्याएको छैन । दयाहाङले ‘ह्याप्पी डेज’को छायांकन सकाएपछि स्वेताको मुख्य भुमिका रहने नयाँ चलचित्रका लागी विस्तृतमा कुरा हुनेछ ।  स्वेता पनि अहिले अमेरिकामा छिन् ।