मन्त्री बन्ने सौभाग्य पाएँ भने नाइँ भन्दिन : कोमल ओली

रेडियो नेपालकी समाचार वाचिका कोमल ओलीलाई आफैले गाउने गीतहरुले बेला बखतमा चर्चा र विवादमा ल्याउने गरेका छन् । ‘पोईल जान पाम शिब’ र ‘झ्वाक तन्नेरी’ गीतले उनलाई चर्चामा ल्याउनुको साथै विवादमा पनि ल्यायो । यो गीत गाए पछि त उनलाई स्टेज कार्यक्रममा निम्ता गर्नेको ओईरो नै लाग्यो । उनले यस बर्षको तीजमा ल्याएको ‘पोइ चाहियो भनेर गीत गाउने मेरो लास्टै चोटि हो’ ले अहिले पनि बजार पिटिरहेको छ । सञ्चारक्षेत्र र गायनक्षेत्रमा लामो समयदेखी सक्रिय गायिका कोमल ओली अब राजनीतिज्ञ पनि भएकी छिन् । गएको सोमबार पशुपतीसमशेर राणा र कमल थापा नेतृत्वको राप्रपाबीचको एकता घोषणा सभामा उनी औपचारिक रुपमा राप्रपामा प्रवेश गरिन् । तिहारपछिबाट सक्रिय रुपमा राजनीतिमा लाग्ने बताएकी कोमल अब राप्रपा नेत्रीको रुपमा पनि चिनिने प्रयासमा छिन् । उनले नयाँ पत्रिकासँगको एक कुराकानीको क्रममा ‘पार्टीमा लाग्नु भनेको कलाकारिताको धर्म छोड्नु’ नभएको बताएकी छिन । उनले भनिन्, ‘कलाकारका रूपमा मञ्चमा उभिँदा त म सबैकी साझा हुँ । तर, समाजसेवाका लागि मैले राजनीति छानेँ । अहिले समाजसेवा गर्न म राजनीतिमा प्रवेश गरेकी हुँ । राप्रपा त मेरो लागि समाजसेवाको एउटा प्लेटफर्म मात्र हो ।’
उनले तत्काल मन्त्री बन्ने सोचमा नभएको पनि बताएकी छिन् । उनले अगाडी थपिन्, ‘अहिले हामीले संविधान कार्यान्वयन गर्नुपर्छ । निर्वाचन गर्नुको विकल्प पनि छैन । यदि निर्वाचनमा मैले सम्मानजनक जित हासिल गरेँ र ठाडो शिर गरेरै मन्त्री हुन पाएँ भने नाइँ नभनुँला ।’